الرئيسية
شطرنج
بتخض لما بشوفك نايم على نفسك
لمابشوف عنيك رايحين جايين
وكأنك خايف لنكون ناقصين
وتنادى علينا عمرك ماغلطت
ف اسامينا
ولسة بتتألم بشويش
وبتصرخ ف ضلوعنا
وانت اللى صوتك كان بحر
او حاجة بتوصل الناس لبعضها
ياريت يابويا تدارى دموعك
علشان نلاقى براح لعيونا
ونقدر نشوفك ولسة بتتألم بشويش
وواخد الخوف كله لوحدك
ايه ده ببص لبياض شعرك
وكأنه بيحكى لى عن ايام المغربلين
وسنين كانت بتبوسك
وسنين كانت بتونسك
اوه يا نجعاوى
من نجع حمادى للمغربلين للامبابة
سنة شقى ويوم تفاريح
ولسة بتتألم بشويش
واحنا بنتكسر اكتر واكتر
وتتنهد تبص لحيطان الاوض
بنظرة شاردة
وكأنك بتدور على اسمك ريحتك عمرك
واتخض لما اشوف حيلك متهد
ياه كان فكرك سواح
يلف الدنيا عشان نرتاح
وننام راضيين
لسة ف درج دولابك الشطرنج
اللى اتعلمته على ايديك
قولت لى انه بيشبه الحياة والموت
يعنى ممكن يتعمل فخ بعسكرى
ويتاخد منك اغلى قطعة ف الرقعة
وممكن تنقذ الملك بنطة حصان
وفخ تانى يموت سيد الرقعة
ويترص دور جديد
فاكر كنا بنلعب ف رمضان
على صوت فيروز
وانت بتسمع وكأنك بتبوس القمر
وتقوم تقرا القران قبل المدفع
وترقص قلوبنا واحنا بنفطر
على صوت النقشبندى
دلوقت مابنسمعش الا صوت كحتك
ودوشة دموعك ع السرير
وانت بتستنى الموت
عشان يترص دور جديد
عادل ابو العلا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي
انضم إلى المنتدى ، فالأمر سريع وسهل
لا يوجد حالياً أي تعليق